آسف

...وكلّ شىء إسود

القطن والفضَّه

ودموعى لما اتوضَّا

والصوت ..ولون العاج

آسف يا دنيايا

آسف ياعمرى اللى باجُرُّه ورايا

بردان،،غريب،، محتاج..

بانده على صوتى

بانده على موتى

بانده على إسمى...

روحى بتترجرج فى جسمى

الشمس عَميا

ميِّت فى عينها النور

فى دموعى غرقانه البحور

ومركبى ضايعه

بتزُقّ فيها الريح

وتعُضَّها الأمواج..

العمر جاب آخرُه

والخَطّ ساب سطرُه

والذنب ..صاب قبرُه..

كلّ الطُرُق زجزاج...

الجرح جوّايا بيِدْمِى

إتلخْلَخِتْ روحى فى جسمى

كَفَر براسى التاج.

=

أنا باعتذرلِك ياحبيبتى

مشكلتى مش إنى اترمى فى حُضنِكْ

مابقيتش عصفور

لَقَى عِشُّه على غُصنِكْ

مابقيتش مستنّى

تطبطبى بإيديكى

وخَلاصى مش آخر عينيكى...

المشكله،، مش فيكى...

ماشى

وشايل ذكرياتى فى هاندباج..،

أصلى بادوَّر فى الزحام

على سِرّ مخفى

الكون ماهوش سايع عواطفى

والقلب مطفى..

وانا بين هجير الورد والياسمين

حزين..

مابين عبير صَهد الحنين

وبين طوفان غضبان

وحُصان جَموح

صَهْلِل وهاج..

حاضن فُراق مساء شجون

قرَّب وعاد

وكلّ شىء بمعاد

قُدّامى سور التلج متحوِّل رماد

توب الحداد

شايب

حتى الحديد

دايب

وحُضُورى غايب فى الفضا

وسكوتى بيقول فَضْفَضا

ومصاحب الوحده بمزاج

=

محاصرنى حُزنى فى دايره كلّ شويّه تضيق

زىّ حبل المشنقه

وزىّ طوق

بيلِفّ حواليّا..سياج

وانا بانصِهِر..من جوّا قلب الشوق

باصِصْ لفوق

نِفسى أروح ..هناك

رافع رايات الحرب والعصيان

واقف على بركان

باصرُخ..وباحتجّ احتجاج

=

آسف ياعالم

ياكابوس دميم

أنا أصلى مجروح فى الصميم

باتمنّى اروح الجنّه أتهنّى

أنا اللى جوّايا..جحيم..

وحزنى غرَّق كلّ أحزان" عبدالحليم"

آسف بلاحدود

آسف عشان موجود..

آسف على الإزعاج.....

                         خالد

                              5/8/2011

                             5رمضان

                                        الجمعة