تِعرَفْ نِفسى فى إيه دلوقتى؟
نِفسى اخنُقْ فيك بإيديَّا لحدّ امّا تقول: حقّى ..برقبتى..
يابْنى ارحمنى بيقى ارحم شيخوختى...
حاسّه بضهرى انحنى زىّ الموزه..
شِبت بقيت ورده عجوزه..
أطلُب لسيادتَك شيشه؟
ولااطلُب لَك جوزه؟
هوَّ البيه مكشَّر ليه؟
مُتحفِّز ليه؟
طيِّب وحنون
لكن مش عارفه مُصِرّ انَّك تظهر على إنك فَرعون..
تعرف توت عنخ أمون؟
حاسّه انَّك أكبر منُّه ،،
فى السِّنّ
وانّه بالنسبالك
نُغَّه..
حاسّاك بتكون ساكت
لكن جُوَّاك أصوات ..بتئِنّ..
حبيبى اتعامل ويّا الدنيا بفَنّ..
تقدر تعمل كده ده انتَ الفنّان
تقدر تعمل كده ماانتاش ساذِج عَدْمان
إنته؟
آه منَّك ده انتَ تجنّ الجنّ.
وحياة النبى طِعِم ولذيذ كده وانتَ مسَبِّلْ لى عينيك الحلوين دول
مش راح تتكلِّم بقى وتقول؟
أبوالهول؟
نِفسى تكون عندك ثقه فيَّه وتحُطّ إيديك فى إيديّه
سيبك م الأوهام سيبك
يعنى انا إيه يجبرنى اتمسِّك بيك
لوكنت انا فعلاً عايزه أسيبك؟
ولاقوّه فى الكون تقدر تمنعنى
إسمعنى
لازم تعرف مين هوّ عدوَّك
وتحافظ على قلب حبيبك
تعرف لو مش عارفاك
لو مش فاهماك
لو مش متأكّده إنّ اللى بيجرى فى عروقك دمّى
وانّ بيحضن همّك همى
كنت زمانى نسيتَك
لكن الظاهر
هتنسّينى ..إسمى
ده انتَ امّا بتضحَك
بتكون الضحكه بالنسبالى ..إعجاز..
ياللى معجِّز نفسَك
حاسّه انّ ناقِصْ لَك عُكَّاز
إيه يعنى الشَّعر الأبيض
أكتر حاجه باحِبّها فيك الشَّعر الأبيض
والشِّعر الإسود...
اللى بتكتبُه بالحِبر الإسود...
وبتكتب نعيك فيه
وتعزّيه
حتى الأحزان اعترفت لَك إنّك أستاذ..
أنا مش عايزاك تزعَل منّى
ماانا عارفاك
حسّاس،،
شَفَّاف،،
ـ زىّ السما والشِّعر ـ
ورقيق قابل للكَسْر
شاشة تليفزيون
غُصن زتون
ورُقاق..وقزاز...
وكلامَك حلو،وشكلَك حِلو،ولكن
فى عينيك ..ألغاز..
حاسّاك مخنوق
مش قادر تتنفِّس
وكإنّ مافيش فى الأرض هَوَا
أو إنّ الهوا بقى غاز..
ماتقولّيش انّ عينيّا عينين بوتاجاز
من فضلَك ماتقولهاش
أنا باعشَق قوى تعبيرك
لما تقول لى انّ البحر بيتوضّا...فى عينيّا
أنا راضيه ضميرَك
مش كده أجمل ياعنيّا؟
لو بسّ تخفِّف من حُزنَك ده شويّه
أصل ده حُزن مُركَّز...
زىّ دموع غاليه ومغليّه...
تعالى فى حُضنى
لولا انّ انا عارفه انّك محتاج لحنانى
وانّك وحدانى
لولا انّ انا عارفه انّك طيّب
كنت أكلْتَك باسنانى...
طيَّرت لى آخر بُرج فى راسى
ورَّمْت لى إحساسى...
وزرعت حرايق وجدانى.
إنسى امبارح
ماتبُصِّش ثانيه وراك.
بُصّ لبُكره
على فكره
أهُه،،
شايفُه؟
هنااااك
وتأكَّد إنّ عينيّا هتِفضَل زىّ ماهيّ سماك
بسّ انتَ اضحك.
ياحبيبى الدنيا ماهيش مضطهداك....
والشمس بتطلَع يوميّاً
عُمرَها مرّه عِطْلِتْ زىّ السّاعه المحتاجه حَجَرْ؟
عُمرَها حَرَمِتْ من حرارتها ودفاها ولو واحد من أىّ بَشَرْ؟
عمرَكْ مرّه سمعت فى نشرة أخبار
إنّ نهار..هيعبُّوه فى قزازه؟...
أو إنّ الشمس اعتذرت
طلَبِتْ ـ منَّكْ بالذات ـ شهر أجازه؟
حِبّ الدنيا،
حِلوه الدنيا،
لِسَّه بخير الدنيا،،
مليانه فَرَح ومرَح ولذاذه...
لأ. إسمَع
راح تفضَل كده ساكِتْ علطول
هصرُخ وبصوت حيّانى واقول: آه يانى
ياناس
إمبارح بقى قُدَّامى
والراجل ده باسْنى
ومِسِكْ.......إيدى
ونَشَلْ قلبى وعَلَّق مواعيدى
دفَّعنى ضريبة حُبّى وزوِّدْ لى فاتورة أيّامى وغرَّمنى غرامى
نصَّاب،،وحرامى
ياحرامى..
ياحرامى..
{ لأ ده انا اتعِبَك}
وأخلِّيك تمشى تكلِّم روحَك
وتلِفّ تدور حوالين نَفْسَك
زىّ المروحه،،زىّ السَّاعه
هات الولاعه...
مش هتدخَّن..دلوقتى
ياإمّا هعُضَّك وادعى عليك
طبعاً صَدَّقت اهو باين فى عينيك
ماانا عارفه
{ تِعِزّ النَّكَدْ المحورى المُنْبثق رأساً
من دائرة الصَّدمه الدماغيّه
الناتجه عن أكل الفول والطعميّه}
"إضحَك كده لازغزغَكْ."
ماتبُصّليش البصّادى
بتحسِّسنى بإنّى فى أوضتى لوحدى
فى اللحظه اللى انا فيها باتخلَّص من لِبْس خروجى
شوف برضُه
نفس البصّه
لأ صَحْصَحْ ياعنيّه
ده انا بنت اسكندرانيّه...
= يعنى أخلّيك تتجنَِّن"بسّ بجدّ"..
=يعنى أسيبك فى الطلّ تموت م الجوع والبرد
=يعنى أودّيك البحر المتوسِّط وأجيبك عطشان
=يعنى أبيعَك واشترى فيك
وانتَ كده واقِف طرزان
ولادَرْيان..
أيواااه
روَّق لاخنُق فيك بإيديّه
مش عارفه
ماباحِبِّش ازعَّلْ إحساسَك
هات ابوس راسَك
"ساعات بتصعب عليّا".
العال ياقوطه
يااللى جنِّنتينى ياقوطه
يااللى هموت منِّك منقوطه..ياقوطه
آه يادماغى
جِبت لى داغى..
بسّ باحِبّك وعاجبنى
{ غَصْبِن عنّك وان كان عاجبَك}
شوف عامل ازّاى ؟
والنعمه باحِسّ ساعات انّك إبنى..
يااااه
ده احنا وصلنا..
خلّى بالَك قوى من نَفْسَك
طمِّنى عليك وقت ماتوصَلْ
واعقَل....
هتكلِّم ويّاك قبل ماانام
إتغطَّى كويِّسْ..
يللا سلام.
