فضفضه...

عايزه أقول لَك حاجه بتحصل


بسّ عشان تعرف قيمتَك عندى

وتبوس وَردى:

لما باشوفَك قلبى المجنون بيدُقّ بسُرعه

وباتَلِّج وعينيّا تزغلل..

واما بتمسِك إيدى

باتحوِّل

وباقيد ..وباشَعْلِل..

زىّ النار فى الشتا والبرد وريح الصمت اللى مجَلجل

عايزه أقول لَك وانا ويّاك

:باتمنّاك..

وباحِسّ بطعم الشَّطَّه..والفِلفِل..

عايزه أقول انّ انتَ حبيبى الآخر

وانتَ حبيبى الأوّل

عايزه أقول انّ انتَ متبِّل....

أحاسيسَك وعواطفَك موَّال

ومشاعرَك ودموعَك شَلال

وعينيك لها نظره بتعمل جوَّايا..زلزال..

عايزه أقول انَّ انتَ رومانسى

زىّ الليل والنيل والشمعه

والصمت القوَّال..

وانا عشقى ليك ولا فى الأمثال

يامشَطْشَط قلبى

يامتبِّل..

=2

مابتعرفش تكون زىّ الناس،والحيَّه،والحربايه

إنّك تتحوِّل وتغيَّر جلدك أو تتلوِّن

وامنا بتكدب فى ثوانى عينيك بتبيِّن

سُكَّر..

مابتعرفش تقول وتعبَّر..

غير بسّ عن اللى تحِسّ بإنّك

عايز عنّه تعبَّر وتفَنِّن..

=3

غامض زىّ النضَّاره السودا

صورتك متعلَّقه جوّ ايا فى قلبى مش فى الأوضه

شَعْرَك الابيض موضَه...

ياأشَفّ وارَقّ وأحلى مدوِّن...

لونَك

لون القهوه ،والكاكاو،

والعسل اللى بتشرب منّه النحلات

وتدَنْدِن..

نِفسى الحَس فيك بلسانى

وأحسِّس قلبَك بحنانى

تِحرمنى من حرمانى..

وتبوسنى وتحضُنِّى

واعمل ولا على بالى.. واصَهين..

إنتَ جميل..

حسّاس ورقيق وكريم

ـ زىّ البحر ـ ومُحسِن..

إنتَ ملاك..عايش وسط الشياطين

محصلْتش ،مش ممكن

وكمان طيِّب وحنيِّن؟

إنت بجدّ تجنِّن

تجنِّن..

=4

نِفسى تحبِّنى قدّ انا مابَحِبِّك

نِفسى اهجُر أوضتى بقى

وادخُل ..وأعيش جوّا فى قلبك

خلّى بالَك من إحساسى

واتّقى ربَّك فيّا يامؤمن..

=5

نِفسى تعيش ويّايا

مش ويّا الوحده والأحزان

تعامِلنى على إنّى قزازة بارفان...

بادعى لَك

ربِّنا يشفيك من حُزنك

يشفى لَك..نَفسَك..

وطريقَك دايماً يتحسِّن.

=6

إسمَع ياجميل..

يشهد ربّ العِزّه عليّا

راح اكون لَك..رحمه،ومودَّه،

وسَكَن..

مش بسّ مُسَكِّن...

=



= 28/9/2011

مساء الأربعاء

فالْسْ...

الحقّ ،الخير ،الجمال.