إشارات

زىّ البشر فى الدنيا كُلَّها


عايزْ أعيش

حُرّ وكريم،،وآمِن

لكن الظلام آمِن

بالظُلم فلسفة حياه

كإنّ مش من حقّها

المَيّه...تِعطَشْ

كإنّ مش من حقّ دمعة عينى

من عينى تِطفَش..

كإنّى مش إنسان

وربِّنا..سَوَّاه..

الظُلم مش شايف سوى،،عَمَاه

وانُّه مافيش إله..

سِواه..

=2

عايزْ أعيش،وأمسح دموع الناس

واترجم الإحساس..خطوط..

عايزْ أحِسّ أنّ السكوت

بقى خلاص

أخرس..

عايز أهِدّ،أهِدّ ،بيت العنكبوت

واقطع إيدين الأخطبوط.

من خُرم إبرة الزمن

عايزْ أفوت

تِصْحَى الحياه،والموت..

يموت..

=3

عايزْ بحور عطش الدموع

تِنْقَصْ

واخرُج..بجدّ،بجدّ،من جسمى

واخْلَصْ..وأتخلَّصْ..

=4

عايزْ أبُصّ بحِدَّه

وامشى فى الطريق ..قُدَّام..

عايزْ أكسَّر حاجز الأيّام

عايزْ أبُصّ لنفسى فى مرايه

وعينيّا ماتكونشى فى قفايا...

مش عايزْ أتوضّا بدموعى..

عايزْ أصلّى ـ فى سِرّى ـ فى الجامع

من غير كلام

ويستحى الشيطان

من إنّه يعمِل نفْسُه شيخ

وإمام..

=5

عايزْ أغنّى زىّ عصفور الكنارى

وامشى على الأوتار

نغم ظاهر صداه طاهر

وزىّ العِطر بينوّر..وسارى

من جوّا قلبى الضحكه تملا الكون

والدمعه تِنزل

تِخبط الأرض الصبوره

زىّ إيد الهُون..

واصرُخ..

واسمّع صرختى للعالمين

حتى الشيطان..

يقول:آمين...

صرخه..تِهِزّ العرش والسماوات

وتسِدّ وِدن الكون...

=6

عايزْ أكون وقت الرضا،،

موّال

واكون كمان وقت الغضب،،

زلزال..

مااكونشى مقسوم ألف نُصّ

وليّا مليون..لون..

=7

عايزْ أعيش

تِنبِّت الحروف فوق الورق

رموش..وريش..

عايزْ أحكِّم قلبى لمّا امسِك الورده

واحكّم عقلى فى الشِدّه

واخُد وجميع الناس فى أحضانى

وكفايه شُرْب مُرّ

وخوف وخَلْفَكْ دُرْ

وخير،،

يقول لى :مافيش.

لا لا لا لألأ لأ ،أنا حُرّ

ولو البيبان اتقفِّلِتْ واتسَلْسِلِتْ

هَشِدّ خيط الفَجر بإيديّه،واجيبُه

لكنّى عُمرى فى يوم ماهَقْبَلْ

إنّى أعيش أهبَلْ..

ولّا أعيش درويش...

=8

عايزْ أفرَّح كلّ خلْق الله

واللى يحِبّ الناس حقيقى

ربِّنا..بيكون معاه

وربِّنا المعبود

لَتاخْدى إيديّا فى إيديكى

ده النيل بحالُه بطلِّتُه بشِبّاكُه

وبميِّتُه الحلوه..

وأصدافُه وأسماكُه

النيل بحالُه ..كُلُّه فى عينيكى..

=9

عايزْ أعيش كريم..كريم

وراسى مرفوعَه

زىّ النخيل

ومستحيل..

أعيش ذليل..

فجر الجمعه12/7/2013