دى رساله باكتِبهالِك،
من غير مهارات..
ولاأىّ مجاز مقصود،
أو استعارات.
أوأىّ بديع أو أىّ بيان
مقصود.
=====
دى رساله طالعه من القلب
،
زىّ الصرخه..
هىَّ الصَرخه محتاجه
بيان؟
هىّ الآه محتاجه
تقول:أنا شِعر..؟
هىَّ الدمعه..
تقدر تستَنَّى لغاية ما
اكتِبها واحوِّلها لشِعر..؟
=====
دى رساله
من وحْى الحيره،
والقلق اللى مقلقِلنى
ومخلّينى مُتَرَدِّد...
دى رساله من وحى عذاب
القلب..
=====
أوِّل مَرَّه أحِسّ انّ
انا عايز اعَيَّط
_ من بعد وفاة أمّى ـ
أوّل مَرَّه أحِسّ انّ
انّ انا نِفسى أعَيَّط،
على صِدرك،
مِنّك..
عايز اتجَرَّأ،،
واتقَدِّمْ خَطوه..
رغم قبولِك ليّا،
لكن خايف لَتصُدِّينى..
مش عارف ليه.
بمكن علشان فارقه معايا؟
يمكن علشان الإحساس اللى
فى قلبى
إحساس أوِّل مَرَّه
أحِسُّه
من أيام الكُلّيّه..؟
بسّ احتِملينى شويّه..
واصبُرى بسّ شويّه عليّا
أشرب خمره كتير جداً
يمكن أقدرْ
أتهوَّرْ..
واتقَدِّم خَطوه...
مش عارف خايف ليه.
خايف مِنِّك؟
يمكن خايف ..مِنِّك..
أصلى تعِبت كتير فى
حياتى
..متجَرَّح..
كُلِّى مِتجَرَّح..
نَفسى مكسوره
إحساسى مكسورالخاطر
وانا قُدَّمك حاسس إنّ
انا مش شاطر...
متجَرَّح..زىّ غروب
الشمس
زىّ الأمس...
زىّ آهاتى وصَرَخاتى
آآآآآه
إنتى الغِنوه اللى فى
بلاد تانيه
بسّ ف ثانيه
بتكونى أقرب ليا
من صُوتى..
غِنوه باغنّيها من قلبى
وبإحساسى
أكتر منها بصُوتى
غنوه باغنّيها وانا
فرحان
أوِّل مَره أحِسّ انّ
انا فرحان
فرحان بسّ بجدّ
مش باضحَك على نفسى
واقول انا فرحان
لأ
فرحان بسّ بجدّ
ومافيش حَدّ
يقدر إنه يكون زيّيي
إزّاى هيكون زيّيى؟
وانتى بتحِبّينى أنا
"مُش هُوَّه،،مُش
هُوَّه"
أعرف بسّ منين انّك
قاصدانى أنا ؟
مش غيرى؟
ساعات باحِس انِّك
قاصدانى أنا
بسّ باكَدِّبْ نَفسى
خايف اصَدَّق نَفسى
إنك بتحِبّينى
وفى الآخر
أتقدّم خَطوه
وتصُدِّينى
تضحكى ضحكه وتقولى
باستفزاز:
مش انتَ يا أستاذ...
عايز اقرّب
مش عايز أبعد
عايز اتأكِّد
خايف اكون موهوم أو نايم
خايف أصحى من النوم
وأشوف قُدّامى كابوس
(مش انتَ ياأستاذ
المقصود)
ربّنا موجود....
يقدر يجعل لى (مَدخل..)
أدخُل بيه رسمى
وألاقى إسمى
وبخَطِّك مكتوب.
=====
إنتى بالنسبالى النور
إنتى
حياه..وصلاه..وبحور..وبخور..
لكن خايف اكون مغرور..
وغرورى مصَوَّر لى..
إنك بتحِبّينى.
بتحِبّينى يانور...؟
بتحِبّينى صحيح يااللى
انتى
شمس مرايتى؟
ولّا ان جيت لِك
هَتصُدّينى وتبقى..نهايتى..؟
تِبقِى قضيتى عليّا..
واحده اتجنِّنت زمان
بسببها
خايف تيجى انتى كمان
وتكَمّلى ع اللى فاضل لى
من عَقلى...
لو صدرتْ منّى كلمه
تزعّل
سامحينى..
بسّ انا عايز اعيش
حُبِّك خلّانى عايز اعيش
لو بتحِبّينى
ماتسيبينيش...
=====
أرجوكى يانور..عينى..
إوعى تسحَبى خيط النور
من عينى
إوعى تقطعى عنى النور
مش عايز اعيش تانى ،
فى الضَلمه..
أرجوكى يانور..
=====
لو بتحِبّينى برضُه هكون
مغرور
أكتر
مغرور..بيكى..
=====
خايف رَدِّك ليّا ف أضعف
إيمان
إنك ماترُدّيش.
ماتسيبينيش.
=====
أكتر من كده مش قادر
اخَبّى
لازم أقول لِك كِلمَه
كاتمها ف قلبى
وان كان رَدِّك سَلبى..
....... ربِّنا يرحمنى
بقى
(بَحِبِّك يانور...)
=====
خالد
2،45
من صباح الأحد
30/8/2015
=====
