فى المرايه

عايزه ادفَعَكْ قُدّام


واصَلَّحْ لَك عيوبَكْ

وعايزه اشيل عنَّك..ذنُوبَكْ..

نِفسى مزاجَكْ يبقى عالى

ويروق ويصفَى فى الندى بالَكْ

وياريت حبيبى كان بإيدى اترجَّى ربّ العالمين

إنُّه يوافِقْ

إنّى أتحاسِبْ..بَدالَكْ...

الله يانور عينى عليك

ياللى المرايه تغير عليك

من كلّ بنت تشوفها فى الشارع عينيك

عاشقاك وإعمِلْ مابَدَالَكْ

ياللى الجمال خجلان ومكسوف من جمالَكْ

والجنَّه بتغير من خيالَكْ....

عاشقاك وخايفه تفِرّ من إيدنا الثوانى

والسنين تِخلَص

تدوب وتسيح وتطلَعْ روحها شمعِة عُمر..

خايفه من الضلمه عليك

خايفه لاضيع من بين إيديك

واتمنى اشوف فرحة عينيك

واخاف لَدَمْعَك ـ لما تبكى ـ يبقى بحر..

مشدوده ليك مش عارفه ليه

مش عارفه إيه السَِّرّ...

إكتِب وإكتِبْ للأبَدْ...

ماانا فى عينيّا السماويّه بحرين..حِبر..

عارفه..أوراقَك وقَلَمَكْ

أغلى عندك من هَوايا ومن كيانى

عارفه انّ قلبى مالوش تمَن عندك

وانّ حُبّى ليك..هَوَا..مجّانى..

ممكن تبيعنى فى ثانيه من غير سِعْر..

ده إِنتَ مجنون شِعر...

=

هفضَل وراك

وهَدْفَعَك قُدّام

وهدفَّعَكْ عُمرَك معايا

هييجى يوم وتحِبِّنى

هتقولهاليَّا زىّ ماتقولها لصوُرتَك

فى المرايه.