الحقّ ،الخير ،الجمال.
ميرسى على ذوقَكْ
ياللى السما بتهَلِّل فرحانه بحُبَّك وبشوقَكْ
وعينيّا تمطَّر،،لما بتضحك وتشوف فَرحَكْ
يااللى جبال العالم بالنسبالَك،،مسكينه
ياللى الكروان بيكَرْكَر،،لما تكون مبسوط وتقول نُكته حزينه...
ميرسى على ذوقَكْ
ياغالى وأغلى من اللولى ومن كلّ نجوم الليل المتبعتره
وبتنزل تعمِل ع البحر دواير ،يامغَرَّقْ حتى البحر العطشان
اللى بيستنجد بيك..وبينده طوقَكْ
ميرسى على ذوقَكْ
ياعالى ..
يااللى ساعات يحلالى أشوفَكْ أعلى حتى من السما...
وأحِسّ انّ السما تحتَكْ،،،
مش فوقَكْ..
ميرسى على ذوقَكْ
الورده..دى..
هشْبُكها فى شَعرى
هعتِبِر انها مهرى...
أنا ليك
لكن علشان خاطرى
- ربِّنا يهديك- رَوَّقْ
- ياللى مافيش حاجه مفَرَّحه قلبَكْ رَوَّقْ
- سيبك م الأحزان ده كفايه حنان روحَك لما ترفرف حواليّا
- وكفايه اما بتتغَزِّل فى عينيّا وتقول انها
- لون الفيروز..والفُزدُقْ
- ياللى عينيك بسّ بتبرُقْ
- بسّ اما تكون راح تبكى يااللى مافيش ولاأىّ فَرَحْ فيك بيحَوَّقْ
- والله ِ باحِبَّك
- وخصوصاً لما الاقيك فى عينيّا بتغرقْ
- وباحِبَّكْ أكتر لما تقول لى شِعرْ
- كلّ كلامَكْ سِحرْ
- ماانتش شاعر،،
- لأ،،
- ساحر..
- وباحِبَّك لما تجينى متكَسَّر متبعتَرْ ،متفَرَّقْ
- وتلاقى مابين دراعينى فى حُضنى المخبأ...
- ميرسى على ذوقَكْ
- يااللى السُّكَّر يتمنّى ويحلَم ..إنُّه يدوقَكْ
- ياأحلى من طعم شفايفى..
- ياسبب قوّتى وسبب ضَعفى
- ياالللى بتشرَب من نور كفّى
- ياحِلمى الدافى اللى اتحَقَّقْ
- ميرسى ع الورده..
- وان كنت انا باتزوَّقْ بالورده
- إنتَ الورده بيك تتزَوَّقْ....
- ميرسى.
28/8/2011
28رمضان ليل الأحد
ليست هناك تعليقات:
إرسال تعليق