أسئله دافيه...

====1

سيبَك من أحزانَك..عيش
رفرف بإيديك زىّ الدراويش
فى عينيك عِشّى..ورموشَك ريش
نظراتَك سرحانه وشارده
====2
حُبَّك خلّا مشاعرى رقيقه
خلّا الجُرأه مابينّا بريئه..
لو قلت:"بَحِبَّك"..دى حقيقه
حتى ان عُمرى فى حُبَّك عَدَّى
====3
لو قلت:"بَحِبَّك"..أنا صادقه
الحُبّ ماهوش مِنحَه..وصَدَقَه
ولاضِحكه تروح أو روح طارئه
الحُبّ ده ذوق،مع شوق،ومودَّه
====4
إوعَى..تخاف منّى فى لحظه
من مُدَّه كبيره وانا ملاحظه
أنا لاانا شَيْطانه ولاواعظه
حَوِّلْتِنى من بنت..لورده..
====5
بين روحى وبين روحَك شَفره..
ده انا لو سِبتَك أبقى انا كافره
ياأرقّ من الورق البَفره..
إطَّمِّن بسّ انتَ وإهدا
====6
عُمرى ماافكّر أجرح قلبَك
واتسبِّب فى بُكاك أو غُلبَك
واوعَى تسيبنى وحياة شنَبَك...
لأنفَّض لك وبلاش هَدَّه
====7
خلّيك فاكرْ إنّى بَحِبَّك
ومافيش غيرَك إنتَ وربَّك
مهما تكون فين هفضل جنبَك
وحنان حُضنى..هيبقى مخدَّه..
====8
وانتَ فى حُضنى بَحِسّ برجفه
وانّ عقارب الساعه..واقفه
وانّك لاسِع..وانّ انا هافّه
وانّك إبنى..وانّى الوالده..
====9
حاسس بيّا وبغَلَيَانى؟
حاسس بالصَهد فى بُركانى؟
ماسِك بإيديك شوق نيرانى؟
ولّا إيديك فى المَيَّه البارده؟..
====
30/11/2013
7،30صباح السبت