عايش حُرّ

الحقّ ،الخير ،الجمال.
============

عايش حُر

وكفايه المُرّ اللى شربْتُه فى كاسات شربات

وكفايه أهات

وكفايه سنين مليانه أنين

وحنين سِكّين ذبَح الياسمين

وهدوم سودا فى عين التجاعيد

وقلوب بتطِيْر،،بالونات صابون

مجنون الِشعر أنا،،هايم فى ملَكوت الكَلِمات

كدّاب مِن قال:ربّنا مات...

ربّنا موجود ومالوهش حدود

ولطيف،ورؤوف،وعَطُوف،ووَدود

وجميل..

والنيل بينشِّف دمع الحبّيبه ..ساعات

والشوق مخنوق نار بتولّع من غير كبريت

وياريت تزورينى قبل ماانام

تحكى لى الحواديت

أصل الضلمه كتيره عليّا وانا لوحدى

مش بيوَنِّسنى شىء عندى

غير العفاريت...

=====

خالد

15/2/2018

11،10مساء الخميس .

=====