إرفَع راسَكْ عند النجمه
إرفع صوتَكْ نشِّنْ كلمه
تِرشَقْ وتصيب قلب الضلمه
إرفع مستوى كلمة لأَّه..
=2
إثبَتْ ضدّ الظُلم ودافِعْ
عن نَفْسَكْ،عندك 100 دافِعْ
وان جُم حاسبوك قول: مش دافِعْ
زوِّد دقَّات قلبَكْ ..دقَّه..
=3
قول: أنا موجود،أنا لازم اكون
قلبَك مأوى عصافير الكون
شَمسَك بتطُلّ من البلكون..
والحلم يادوب،،محتاج زقَّه..
=4
إحنا فى مركبه والموج عالى
ينده لها مَرساها:تعالِى
هات أفعالَك على أفعالى
ننقذ بحرنا من دى الغَرقَه
=5
ماانتاش ديكور ،ماانتاش زينه
ماانتاش جُثه..حيَّه ،،رزينه
ولاعامل دور نُكتَه حزينه...
ولاهوا إزرقّ من الخنقه
=6
إتنفِّس عطر وحُريَّه...
الدنيا فى حُضْنَكْ حوريَّه
الدوا.. منبَعُه سِمّ الحَيَّه
والنور حَيَّا قلوبنا الصادقه..
=7
قول للأحلام: "إظهرى..بانى.."
إزرَع خَيرات علِّى مبانى
: أنا صاحب الأرض أنا البانى
عُمرى عماره،،وقلبى..شَقَّه..
=8
لما تبوس السما بوس تانى
إلبِس أزهار البُستانى
إقلع..جسمك..والبسُه تانى
عيش بُكره جميل،ونبيل،إنسانى
قول لليأس:"خلاص،،إنسانى.."
لما تموت ..ذكراك راح تبقى...
خالد
7/6/2011
ظهر الثلاثاء
ليست هناك تعليقات:
إرسال تعليق