يعنى خلاص نزَّلْتى
ستاير الحُبّ خلاص؟
والمسرح بقى فاضى؟
يعنى خلاص
النورانطفى،ربِّنا عنّنا مابقاش راضى؟
ولّا انا حاسس،بالوحده
البارده،وطعم الخُوف؟
وبَتَكْتِك ،واحنا فى حَرّ الصيف؟
=======
عايزه تقطعى آخر سِلْك
بيوصِل بينى وبينِك؟
عايزه تِعمى النور..اللى
فى عينى وعينِك؟
ولّا قطَعْتى الخطّ اللى
بيربُط بينى وبين ربّ العِزّه؟
يعنى خلاص الشحن فصَلْ..؟
واتلَخْبطت الصوره
،والألوان اتّهَزّتْ؟
يعنى كده ببساطه يموت
السُّكّر فى شفايفِك،
من بعد ماكنتى بالنسبالى
عسَلْ؟
يعنى اشكيكى لربّ
العِزّه؟
ولّا انا أصلاً روحى مش
فارقه معاكى؟
ومعادش فى قلبك ليّا
مَعَزّه..؟
=======
أنا ناسى صحيح انّ انا
ميِّتْ؟
ولّا انا ناسى انّ انا
مش فاكر...؟
=======
حاضِرْ...
ماشى،وسايبهالِك.
سايب العصافير ميّته على
صِدر صباحى
ماشى ومش عايز منِّك
حاجه،
ماشى وانا شايل على ضَهرى
جراحى
وسايبهالِك،
يمكن..،
ترتاحى.
=======
ماانتى خلاص لَمِّيتى
الحاجه،وقفلْتى الباب.
ماانتى خلاص سدّيتى فى
وشّى،،كلّ الأبواب.
يعنى الورده
اتخنَقِتْ،من عِطرَها؟
يعنى الغِنوه اتحرَقِتْ
من جَمرَها؟
والوتر الحسّاس
الشفّاف،،
إحساسُها
الشفّاف،،كدّاب..؟
=======
ياخسارة عُمر انا
عِشتُه،وانا مستنّيكى
ياخسارة دُعا
وصلاه،علشان ربّنا يهديكى..
ياخسارة مرايات..بصّيت
فيها..عشان الاقيكى..
=======
إزّاى خدتينى فى حُضنِك،
وزرعْتى فى ضَهرى
السِكّينه؟
إزّاى الفرحه اتمنّيتها،
ولاقيتها،
زغروته حزينه؟
=======
آه،يادموع مالهاش لازمه
آه،من إحساس صادق ،مش
موجود فى السُوق،
علشان فيه أزمه..
آآآآآآه
من قلب ادّيتهُولِك،
وانتى
دُستى عليه بالجزمه...
=======
أنا حاسسْ إنّ ده مش
زمنى
أنا حاسسْ إنّ ده مش
وقتى
وكفايه ياربّى كده
علشان كلّ ده فوق طاقتى
=======
إرحل ياعُمر مُمِلّ طويل
ومالوش آخر
حاضِر...
ليه..ده انا كل قصيدة
شِعر كتبتها فيكى كانت بيتِك؟
رُوحى للّى تروحى لُه
خلّيه يْحِبِّك،قدّ
ماحبّيتِك.
=======
ربّنا..هُوّ أحَنّ
عليّا،
من قلب الصخره اللى فى
صِدرِك
وابقِى افتِكرى انّ
الورده اللى فى شَعرِك،
كانت عُمرى وسَكِّنْتُه
فى عُمرِك.
=======
أنا عارف،
كلّ امّا ابدأ مشوار،
لازم آخرُه دموع
كلّ امّا يصَبّحْ على
روحى نهار،
الليل ييجى أوام
يلاقينى موجوع
كلّ مااقول انّى لاقيت
فى الصحرا،حنان ينبوع
أرجع،وانا مَروى عَطَشْ
وواكِلنى الجُوع..
دايما ًدى نهايتى
مابتِتْغَيَّرش
مع إنى حلِمت انّ العُمر
ده ممكن يبدأ م الآخر....
وانا فى الآخر
حاضر...
هُوّ اللى يقول لِك
حاضر،تِقطَعى شُريان قلبُه؟
واللى بتِتْمنّى يقطَع
شُريانِك،
تقولى لُه:حاضر...
حاضر.
أنا سايب جسمى ومسافِر.
=======
وبرغم انّ انا
بردان،عطشان،مليان أحزان،
خايف
وبرغم انّ انا نظرى فى
عينى ،
وانّ انا مع كده مش شايف
وبرغم انّ انا خايف قبل
ما اسافر
تسكُن فيّا..جَلطَه..
وبرغم انّ انا ماغلطّش..
(إلّا إذا كان
حُبِّك..غَلْطَه..)
حاسسْ
إنّ عقارب الساعه،،ماشيه
والزمن،
واقِفْ..
=======
كلّ جبال الأحزان،
قُدّام حُزنى،
شىء هايف..
=======
وعشان انا ماغلِطّش،،،
أنا آسِف....
=======
خالد
7/3/2016
1،15من صباح الإثنين.
=======
ليست هناك تعليقات:
إرسال تعليق